هم عندك وجه !

هم عندك وجه ودگ على الباب
لا.. لاتظل ساكت، أحچي ياچذاب

وگفتك گدامي ماريدها أتطول
شعندك بعد شتريد ، شتريد گول

ماظل عذر عندك ؟ ,, لو خلصت الأسباب !،،

لاتتعلثم .. شعندك أحچي، يله أتكلم
رغم أني .. من أسمع صوتك أتألم

ياحارمني ..
من أحلى أيام العمر ،، من عز شبابي

ياحارگني ..
يامخليني رماد الجمر ،، وك حس عذابي

تريد أسامحك ..
أشلون أسامحك ..
يل بيدك هدمت أحلام حبي

تريد أسامحك ..
أشلون أسامحك ..
وانتَ ذاك، هذاك ذباح گلبي ..

وگفتك گدامي ماريدها أتطول
شعندك بعد شتريد ، شتريد گول

ماظل عذر عندك ؟ ,, لو خلصت الأسباب !،،

الحب مو سوق وتمر بيه
وتشتري كل التريده

الحب للگلب بستان تلگيه
ورداته يرون من وريده

ولك روح .. لاتنتظر،
لا.. لاتظل واگف گبالي
ولك روح .. لاتلتفت،
يل ما الك أول، ماالك تالي

يامن باع بيا برخص وتندم
بأرخص رحت أبيعك وگلك أتعلم ,,

هم عندك وجه ودگ على الباب
لا.. لاتظل ساكت، أحچي ياچذاب

وگفتك گدامي ماريدها أتطول
شعندك بعد شتريد ، شتريد گول

ماظل عذر عندك ؟ ,, لو خلصت الأسباب !،،
..

حكمت البيداري

يبقى بينا الأمل ..
بين كل الناس يتقاسم الود
يبقى بينا الأمل ..
بدنيا بيها المال ما ينعبد
يبقى بينا الأمل ..
نشوف السما تمطر ورد

ياحلم ..
ياحلم عيش بخيالي شما عشت
لابد اشوفك يوم، بيوم تحققت
على صدور الناس مرسوم الصليب
يسوع ياروح الله وأبنه الحبيب
بالمحبة والسلام يامن مجدت

يبقى بينا الأمل ..
نشوف السما تمطر ورد

يكفي ..
يكفي ياسيف الظلم هوايه طغت
ومن عباد الله ياما وشكثر ذبحت
الي انخذ بالسيف، بالسيف يرد
يخسى الذي يظنك ياحر تصبح عبد

يبقى بينا الأمل ..
نشوف السما تمطر ورد

ياملك ..
ياملك كل الملوك لأجل ضعفي اتعذبت
يا أبن مريم يامن تحديت الموت وگمت
خل يگول من گال شبهه لهم
احنا ادرى بالكتب شبيها شتظم

يبقى بينا الأمل
نشوف السما تمطر ورد
..

بيدارو

من هنا الى منتدى البيداري للشعر الشعبي العراقي والنبطي والعامية العربية أهلاً وسهلاً بكم

ليش هَل قَسوه
ليش هذا الظلم
گلبي اليودّك، ياوسفَه
ياوسفَه، بحبُك ينهُضّم

عالي النَجّم إنتَ، عالي النَجّم
وأنّا على گاع الله، أبعينَك قِزّم ..
ليش هَل قَسوه
ليش هذا الظلم ..

بَشّر إحنا، هَم مِثلك بَشّر
وضّلوع بينا مِن آدم وحوا
لانَعُبِد شَمِّس لا نَعُبِد قَمَّر
أهِّل توحيد إحنا وكِتّاب الله ..

عالي النَجّم إنتَ، عالي النَجّم
وأنّا على گاع الله، أبعينَك قِزّم
ليش هَل قَسوه
ليش هذا الظلم ..

هَم عِندَك گلُّب مِثلي، ينبُض يدِّك
ودّگاتَه ماأظِنها، لا ماأظِنها چِذّب
وعِندك عِيون ياما بللِّت خَدّك
وكُل دَمعَه مِنهّا مَعطّره بالحُب ..

عالي النَجّم إنتَ، عالي النَجّم
وأنّا على گاع الله، أبعينَك قِزّم
ليش هَل قَسوه
ليش هذا الظلم ..

للدّنيا جيّتنا بآمر واحد احد
مُنّو بينا اختار أمّه لو أبوه
مُنّو بينا يدّري بنيّه لو ولّد
وكلّمَن علَّى دين أهله قيّدوه

عالي النَجّم إنتَ، عالي النَجّم
وأنّا على گاع الله، أبعينَك قِزّم
ليش هَل قَسوه
ليش هذا الظلم
..

بيدارو
30.11.2010

مرحباً بكم في مدونتي الشخصية ,, الشاعر حكمت البيداري